రాజాపేట: పోస్టర్ ఆవిష్కరణ
రాజాపేట: రాష్ట్రంలో, దేశంలో రైతులు, వ్యవసాయ కూలీలు ఎదుర్కొంటున్న సమస్యలను ప్రభుత్వాలు తక్షణమే పరిష్కరించాలని ఏ.ఐ.కె.ఎం.ఎస్. యాదాద్రి భువనగిరి జిల్లా ప్రధాన కార్యదర్శి బేజాడి కుమార్, ఇఫ్టూ జిల్లా నాయకులు రేగు శ్రీశైలం బుధవారం డిమాండ్ చేశారు.
సెప్టెంబర్ 28, 29, 30 న ఖమ్మంలో జరిగే ఏ.ఐ.కె.ఎం.ఎస్. జాతీయ మహాసభలను జయప్రదం చేయాలని పిలుపునిస్తూ రాజపేట మండల కేంద్రంలో మహాసభల పోస్టర్లను ఆవిష్కరించారు. ఈ సందర్భంగా బేజాడి కుమార్, రేగు శ్రీశైలం మాట్లాడారు. రైతులకు పెట్టుబడి అవసరమైన సమయంలో రైతు భరోసా నిధుల విడుదలలో ఆలస్యం చేయడం వల్ల రైతులు ఆర్థిక ఇబ్బందులు ఎదుర్కొంటున్నారని అన్నారు. రైతులకు సకాలంలో పెట్టుబడి సాయం అందించడంతో పాటు పంటలకు గిట్టుబాటు ధర, రుణభారం నుంచి ఉపశమనం, సాగునీరు, నాణ్యమైన విత్తనాలు–ఎరువులు అందుబాటులో ఉండేలా చర్యలు తీసుకోవాలని కోరారు. ఎన్నికల సమయంలో రైతులు, వ్యవసాయ కూలీలకు ఇచ్చిన హామీలను ప్రభుత్వాలు పూర్తిస్థాయిలో అమలు చేయాలని బేజాడి కుమార్ అన్నారు. వ్యవసాయ కూలీలకు ఏడాది పొడవునా ఉపాధి, కనీస వేతనాలు, సామాజిక భద్రత కల్పించాలని డిమాండ్ చేశారు. గ్రామీణ ప్రాంతాల్లో ఉపాధి అవకాశాలు తగ్గిపోవడంతో కూలీ కుటుంబాలు తీవ్ర ఇబ్బందులు పడుతున్నాయని తెలిపారు. కేంద్రంలోని నరేంద్ర మోడీ ప్రభుత్వం 2022 నాటికి రైతుల ఆదాయాన్ని రెట్టింపు చేస్తామని ప్రకటించినప్పటికీ, ఆ లక్ష్యం సాధనపై స్పష్టత లేకుండానే సంవత్సరాలు గడిచిపోయాయని బేజాడి కుమార్ అన్నారు. కేంద్ర ప్రభుత్వం తీసుకొచ్చిన మూడు వ్యవసాయ చట్టాలకు వ్యతిరేకంగా దేశవ్యాప్తంగా రైతులు పెద్ద ఎత్తున ఉద్యమించారని, చివరకు ఆ మూడు చట్టాలను 2021లో రద్దు చేయాల్సి వచ్చిందని గుర్తుచేశారు. రైతు–కూలీల సమస్యలను ఎన్నికల సమయంలో మాత్రమే ప్రస్తావించకుండా, వాటి పరిష్కారానికి ప్రభుత్వాలు బాధ్యత వహించాలని ఆయన అన్నారు. రైతులు, వ్యవసాయ కూలీలు ఐక్యంగా తమ హక్కుల కోసం పోరాడాలని పిలుపునిచ్చారు.
ఈ కార్యక్రమంలో సంఘం నాయకులు మేకల వెంకటేష్, ఆర్.ఉదయ్, బి నరసింహులు, కే కృష్ణయ్య, బి సిద్ధులు, ఏ రంజిత్, బి కొమురయ్య, పి మల్లయ్య, ఎం ఉపేందర్, డి.రవి, బి మహేందర్, కె నర్సింహులు, బిక్షపతి,బి. స్వామి తదితరులు పాల్గొన్నారు.